OMENACHE A CHESÚS BERNAL EN O SEGUNDO CABO D’AÑO D’O SUYO FENEZIMIENTO

En o mesmo auto, que se retransmitirá por Youtube y Facebook o lunes 22 de marzo de 2021 a ras 19 oras, se presentará o numero 14-15 de El Ebro, revista de pensamiento aragonesista, espezialmén adedicato a ra suya fegura.

A Fundazión Gaspar Torrente ha organizau con a colaborazión d’a Universidat de Zaragoza, o día 22 de marzo a las 19 oras, un auto de memoria y omenache a Chesús Bernal, insigne politico aragonesista y profesor d’a Universidat de Zaragoza que estió miembro d’o patronato d’ista Fundazión.

Con tal ocasión, a Fundazión Gaspar Torrente presentará o numero 14-15 d’a suya revista de pensamiento aragonesista El Ebro d’a man d’o suyo Direutor, Antonio Peiró, adedicau a la fegura de Bernal, asinas como a analizar a custión d’a Lei d’autualizazión d’os dreitos istoricos d’Aragón. L’auto se reyalizará online a causa d’as restrizions d’a pandemia y se podrá seguir a traviés d’os siguiens enrastres: : 

Youtube: https://www.youtube.com/watch?v=BAScBb9TmzY

Facebook: https://www.facebook.com/206236899511552/posts/2162996190502270/

Chesús Bernal (Valtorres, 8 de chinero de 1960 – Zaragoza, 22 de marzo de 2019), Doctor en Filolochía Romanica y profesor d’a Universidat de Zaragoza y autor de bellas obras sobre a luenga aragonesa, estió uno d’os fundadors de Chunta Aragonesista en 1986 -en do desempeñó cargos de direzión- y d’a Fundazión Gaspar Torrente ta la investigazión y desembolique de l’aragonesismo en 1998.

A istorica dentrada de Bernal en as Cortes d’Aragón como deputau chunto a Chesús Yuste, estando amos os primers representans eleutos d’una formazión aragonesista de zurdas en a era democratica, suponió a rancanza d’a suya brillante carrera parlamentaria en a cuala destacó por a suya apasionata tot de vez que impecable y intelichén oratoria y por a gran calidat d’as iniziativas que promovió como portiavoz d’o suyo grupo parlamentario.

Dixó d’estar miembro d’as Cortes d’Aragón en 2011 ta reincorporar-se a l’autividat dozén, estando nombrau en 2018 Direutor d’os Cursos Estraordinarios d’a Universidat de Zaragoza.

O suyo nombre será recrosidato en los anals de l’aragonesismo chunto con os d’Emilio Gastón, José Antonio Labordeta, Gaspar Torrente, Julio Calvo Alfaro y atras feguras istoricas que sabioron alimentar a flama d’a identidat y a presonalidat politica d’Aragón.